សិក្សា​ក្បួន​ Hacker និយម​ប្រើ​វាយ​ប្រហារ​លើ​វេបសាយ​នានា

សព្វ​ថ្ងៃ​មាន​ការ​វាយ​ប្រហារ​របស់​ Hacker ​តាម​ប្រព័ន្ធ​អ៊ីនធឺណិត​មិន​ថា​ក្នុង​​ប្រទេស​កម្ពុជា​ ឬ​ក្រៅ​ប្រទេស​ទេ​។ ប្រិយមិត្ត​មួយ​ចំនួន​អាច​មាន​ចម្ងល់​ថា​ពួក hacker មាន​វិធី​សាស្ត្រ​អ្វី​ និង​ប្រើ​ប្រាស់ Software អ្វី​ខ្លះ​ដើម្បី​វាយ​ប្រហារ​គេហទំព័រ ក៏​ដូច​ជា​ប្រព័ន្ធ​សុវត្ថិភាព​ផ្សេងៗ។

លោក​ សារ៉ាត់​ អ្នក​ជំនាញ​កម្មវិធី​មួយ​រូប​បាន​ឲ្យ​ដឹង​ថា​ តាម​លោក​ដឹង​មាន​ OS មួយ​មាន​ឈ្មោះ​ថា Backtrack ​ស្រដៀង Windows OS ដែល​គេ​ប្រើ​នៅ​​លើ​កុំព្យូទ័រ​​ ដែល​​​ Hacker មួយ​ចំនួន​និយម​ប្រើប្រាស់​ ដើម្បី​​​ធ្វើការ​វាយ​ប្រហារលើ​​គេហទំព័រ ក៏​ដូច​ជា​ប្រព័ន្ធ​សុវត្ថិភាព​​​​ក្រុមហ៊ុន​ឬ​ស្ថាប័ន​ការងារ​នានា។

លោក​ថា Backtrack មាន​លក្ខណៈ​ពិសេស​ត្រង់​វា​អាច​លាក់​បាំង​ IP Address មិន​ឲ្យ​រក​ឃើញ​ ដោយ​មាន​ការ​ផ្លាស់​ IP ទាំង​នោះ​ទៅ​ជា​ IP មក​ពី​ក្រៅ​ប្រទេស។ OS មួយ​នេះ​ក៏​ល្បី​ថា Hacker និយម​ប្រើ​ដើម្បី  Hack យក​ Wifi ​ដែល​មាន​ Password។

គេហទំព័រ​មិន​មែន​ចេះ​​តែ​ Hack ចូល​បាន​ឆៅ​ៗ​នោះ​ទេ លុះ​ត្រា​តែ​អ្នក​សរសេរ​កូដ​នៃ​គេហទំព័រ​ទាំង​នោះ​អន់ មាន​ចន្លោះ​ប្រហោង​ច្រើន Bug ធ្វើ​ឲ្យ​ងាយស្រួល Hack។ Backtrack បាន​កើត​ចេញ​ពី​ប្រតិបត្តិការ​មួយ​ដែល​និស្សិត​ IT បាន​រៀន​មាន​ឈ្មោះ​ថា​ Linux សម្រាប់​ប្រើ​បញ្ជា​ប្រព័ន្ធ​ដោយ​ការ​ប្រើ​ Command និង​ Code។

សារ៉ាត់​​បញ្ជាក់​ថា Backtrack បង្កើត​មក​​ដើម្បី​តេស្ត​ប្រព័ន្ធ​សុវត្ថិភាព​​​ដែល​មាន​ចន្លោះ​ប្រហោង​នៅ​ ក្នុង​ស្ថាប័ន ឬ ក្រុមហ៊ុន​នានា ព្រោះ​ OS នេះ​មាន​ Tools សម្រាប់​​ធ្វើ​តេស្ត​ច្រើន។ វា​មិន​មែន​សម្រាប់​តេស្ត​រក​ចន្លោះ​ប្រហោង​តែ​លើ​ Website មួយ​ទេ​ តែ​ក៏​អាច​លើ Smartphone ផង​ដែរ​។

យ៉ាង​ណា​លោក​ សេង​ ង៉ូន​ មន្រ្តី​ព័ត៌មាន​វិទ្យា​មួយ​រូប​​បាន​ឲ្យ​ដឹង​​ថា​ បើ​និយាយ​ពី​ Hacker មាន​វិធី​សាស្ត្រ​​​ខុសៗ​គ្នា​​ដើម្បី​វាយ​ប្រហារ​​ដូចជា​តាម​រយៈ​ការ​ ប្រើប្រាស់​ Software ឬ Plugin។
លោក​បញ្ជាក់​​ ​Hacker អាច​ប្រើ Maleware ដែល​មាន​លក្ខណៈ​ដូច​ទៅ​នឹង​មេរោគ​ Virus រំខាន​ដើម្បី​វាយ​ប្រហារ​ ក៏​ដូចជា Tools មួយ​​​មាន​ឈ្មោះ​ថា Tor Browser​ដែល​​អាច​​លាក់​បាំង IP Address និង Tools មួយ​ចំនួន​ទៀត​ដូច​ជា Havit ដែល​​មាន​សមត្ថភាព​អាច​​ជ្រៀត​ចូល​ទៅ​ដល់​ XQL របស់​គេហទំព័រ​នោះ​។ ជាមួយ​គ្នា​នេះ​ក៏​អាច​ប្រើ plugin Hack ​ដូច​ជា Hack Bar , Flag IP , Free VPN ផង​ដែរ។

អ្នក​ជំនាញ​​រូប​នេះ​បាន​បញ្ជាក់​ថា ដើម្បី​ Hack ប្រព័ន្ធ​សុវត្ថិភាព​ក្រុមហ៊ុន​ឬ​ស្ថាប័ន​នានា​​ Hacker ​បាន​​សិក្សា​ស្វែង​រក​​នៅ​ចន្លោះ​ប្រហោងនៃ​ប្រព័ន្ធ​សុវត្ថិភាព​មួយ​នោះ​​​ ដោយ​​រង់ចាំ​​ឱកាស​វាយ​ប្រហារ​។ ចំពោះ​អ្នក​សរសេរ​ Code បង្កើត​ Website ត្រូវ​សរសេរ​កូដ​កុំឲ្យ​មាន​ Bug ច្រើន​ ត្រូវ​ការ​ពារ​ Database ឲ្យ​មាន​សុវត្ថិភាព​ខ្ពស់​បំផុត។

អត្ថបទ៖ ដារ៉ាឆានី